50 sena ta' Edukazzjoni f'Raħal Ġdid

F'għeluq il-ħamsin sena anniversarju mit-twaqqif ta' l-iskola Ġuże Damato f' Raħal Ġdid, li tagħmel parti mill-Kulleġġ Saint Thomas More, saru numru ta' attivitajiet fejn kemm l-għalliem kif ukoll l-istudenti ħadmu bis-sħiħ sabiex dan l-avveniment ikun suċċess. L-ewwel ħaġa li saret għal dan l-avveniment kien it-tfassil ta' logo ġdid għall-iskola, fejn fih insibu pagun miexi fuq ktieb. Il-pagun jissimbolizza l-arma tal-Granmastru Fra Antoine de Paule li kien il-persuna li bena Raħal Ġdid (Paola) u l-ktieb jfisser l-għodda li permezz tiegħu l-għalliem jwassal l-edukazzjoni meħtieġa għall-iżvilupp ħolistiku ta' l-istudent.

Fit-23 ta' April 2008 l-E.T. Mons. Arcisqof Pawlu Cremona ġie mistieden sabiex iżur l-iskola Ġuże Damato. L-arċisqof dar ma' l-iskola u iltaqa' mat-tfal, ma' l-għalliema, mal-prinċipal tal-kulleġġ, l-kap ta' l-iskola, nies distinti u anke ex-kapijiet li għadhom ħajjin. Infetħet irħama kommemorattiva bl-ismijiet tal-kapijiet ta' l-iskola kollha li servew fl-iskola u din ġiet imbierka minn Monsinjur Arcisqof stess. Wara saret mixja simbolika mill-iskola sal-parroċċa ta' Kristu Re. Hemmhekk Monsinjur Arċisqof għoġbu jiċċelebra quddiesa animata b' mużika sabiħa li ndaqqet mill-"University Junior College Orchestra". Din ġiet miġjuba għal ta' l-apposta għall-okkażjoni u tmexxiet minn Mro.Emanuel Pirotta (għalliem fl-iskola Ġuże Damato) stess.

Fil-25 ta' April 2008 ittellet lejla kulturali fis-sala ta' l-iskola innifisha. Għall-okkażżjoni ġew mistiedna ex-edukaturi u kapijiet li kellhom x'jaqsmu ma l-iskola fil-ħamsin sena li din kienet miftuħa. Il-programm tal-lejla kulturali kien jikkonsisti f' kunċert mill-banda Filarmonika Fra Antoine de Paule, kant minn Lawrence Gray (ex-student ta' l-iskola), qari ta' poeżija mis-Sur Alfred Massa, feature maħdum dwar l-istorja tal-ħamsin sena ta' l-iskola innifisha u diskorsi mill-kap ta'l-iskola u l-prinċipal tal-kulleġġ rispettivament. Wara inkixfet irħama kommemorattiva li tfakkar il-ħamsin sena.

Fit-30 ta' April 2008 saret Open Day fejn ġew esibiti ħafna mix-xogħolijiet tat-tfal li kienu bit-tema tal-50 anniversarju. Bosta ġenituri tat-tfal li jattendu l-iskola u oħrajn mill-primarji viċin attendew għal din l-attivita'. Waqt l-Open Day il-ġenituri kellhom ukoll l-opportunita' li jaraw lill-istudenti ta' Ġuże Damato waqt il-ħin ta' l-iskola normali tagħhom.